曾於電視台教授烹飪多年嘅方太 方任利莎 周末生日，日前家人為佢預祝緊接嘅農曆與新曆生辰，相中可見方太雖已年屆90有多，不過招牌笑容依舊，仲同家人一齊外出提前慶祝生日，非常精神。
雖然年前曾因血液感染而需入院廿多日，不過方太康復後精神十足，由幼女阿寶代為管理嘅社交平台專頁，亦不時更新方太近況，好似呢日就寫道近日為媽媽預祝生日嘅情況喇。
「為咗準備慶祝方太呢個週末嘅生日（週六係農曆，週日係西曆，喜上加喜啊！）今日我地去咗整頭髮。整完頭髮我同媽咪去食飯，方太稱讚外籍服務員靚女，外籍服務員亦回敬話方太好優雅。我話俾服務員聽，媽咪呢個週末就95啦！服務員聽咗非常驚訝，大讚方太精神同埋時髦」
「吃完晚飯，我地叫咗雪糕做甜品。等咗一段時間都唔見雪糕嘅影蹤，催促下佢哋話好快好快。轉頭雪糕上枱，原來為方太準備咗生日甜點！哇！好開心好驚喜！」
方太早年於友台長年主持烹飪節目而為人熟悉，年前佢亦曾現身TVB接受訪問
而日前阿寶又公開方太手挽一名小鮮肉嘅背面圖片，更指今日已成為新晉男演員，而經過幾日之後阿寶就正式開估，呢位小鮮肉就係近年參與過唔少影視作品嘅 朱鑑然 ，原來朱仔一家同方家係家族朋友，方太自細就睇住朱仔長大喇。
