《夫妻的博弈》林漪娸與張頴康飾演「Cheap精母子」衰格得嚟又超搞笑，其無賴、貪小便宜形象演繹得深入民心。畢竟惡人自有惡人磨，8月28號播出嗰集，「野蠻奶奶」林漪娸就遇上「貪錢阿媽」黎燕珊，二人豁出去「真打」，喺公司大堂大打出手，更波及無辜嘅張頴康。
呢集講「貪錢阿媽」黎燕珊想喺女婿身上「攞著數」，撞正親家「野蠻奶奶」林漪娸，二人火星撞地球，喺公司大堂當眾開火，黎燕珊扯林漪娸頭髮，林漪娸就瘋狂拍打及起腳攻擊，戰況激烈，張頴康喺勸交嗰陣，被黎燕珊踢中「上五吋下五吋」，林漪娸見阿仔受傷，再度衝向黎燕珊肉搏，郭柏妍情急之下，咬住林漪娸嘅手臂，鬧劇雖然平息，卻令婆媳關係急速惡化。
製作組喺社交平台上載「片場秒變格鬥擂台🥊🤣」幕後花絮，見黎燕珊同林漪娸呢場「動作戲」比拼演技之餘，仲比拼武術，場面一度失控，連導演都笑到停唔到，原來黎燕珊同林漪娸埋位前，已溝通好係唔留力「真打」，黎燕珊笑言拍完呢場戲後，肌肉足足痠痛咗一星期，而林漪娸亦打到太攰，雙腳突然抽筋，要導演上前為佢按摩，二人咁瞓身演出，難怪觀眾睇得過癮又肉緊啦！
