張智霖 日前踏入55歲，人緣甚廣嘅佢最引人注目嘅，莫過於獲相識數十載嘅好兄弟 郭富城 送上的親筆書法作品賀壽喇。近年醉心書法嘅城城，造詣備受肯定，過往佢親筆題字《仁者》同《仁心》早前，早前就曾於慈善拍賣以高達150萬港元由 鍾培生 拍得。今次為祝賀好友 Chilam生日，城城再次揮毫寫下草書字畫相贈，別具心思。
城城呢幅墨寶以龍飛鳳舞嘅草書寫成，有人認為係Chilam嘅巡迴演唱會主題「在」字，亦有人拆解內容係「馳騁」兩字。而壽星本人就於社交平台曬出同城城嘅合照仲有墨寶賀禮，又興奮寫道：「多謝郭富城送我的生日禮物，太有意義了！」
除收穫好友厚禮，Chilam日前於廣州舉行嘅《在》演唱會，亦迎接另一份「生日禮物」，19歲囝囝「魔童」（張慕童）以樂隊結他手身份驚喜登台伴奏。據指魔童並非靠「星二代」特權登台，事前同樣經過演唱會音樂總監考核先加入團隊。
演出期間雖然魔童一度遇到結他斷線嘅突發情況，不過佢就冷靜臨危不亂處理，獲爸爸Chilam讚賞大有專業風範。魔童唔止遺傳父母嘅超高顏值，又展現出對音樂嘅熱誠同才華， Chilam更坦言可以同兒子同台係極大感恩同祝福，相信呢段回憶亦係今年最溫馨難忘嘅生日記憶。
