鄭秀文、倪晨曦 同一眾新勢代藝人包括 魏浚笙 、譚文萱 等現身品牌活動，Sammi霸氣顯時尚魅力。
Sammi早前原定7月舉行嘅演唱會延期，日前終於落實明年5月正式登啟德開騷，令眾多Mi迷好興奮，Sammi亦同樣期待，日子方面佢同團隊特意遷就於周末演出，可以令原定嘅歌迷更易就時間。
8月19日係Sammi嘅54歲生日，由於老公許志安開騷在即，Sammi自己亦有工作在身，所以生日正日兩公婆選擇簡單貼地食茶記，仲巧遇尹光，Sammi都有解釋返當日其實係安仔好想到呢間指定餐廳飲杯檸茶。
講到生日禮物，Sammi話叫咗安仔唔使送，因為開心健康比起呢種儀式感大於一切，但安仔都好傳統，送咗個紅封包俾佢，至於安仔有冇獻上Birthday Kiss？Sammi甜笑反問大家問呢啲...
安仔十月開騷，近日正積極備戰，Sammi都有透露安仔嘅心情，仲話因為只開得幾場，Sammi自爆欠落好多飛債，笑言被追飛追到甩頭髮，雖然非常頭痛，但亦戥安仔開心。
另外，宋宛穎、莊子璇、翁嘉穗三位歷屈港姐冠軍都有現身，翁嘉穗一身高衩裙露長腿，佢更大讚今屆港姐佳麗質素高，考起評判。而Sabrina同Hilary將會為港姐決賽夜擔任表演嘉賓，佢哋都期待新一屆師妹誕生，仲向佢哋大派選美貼士。
