周殷廷於紅館舉行一連兩場《The Alchemist Live 2026》演唱會，首次踏上紅館舞台嘅佢身兼導演，仲帶同私伙電單車登陸舞台。首場演出有好友Tyson Yoshi擔任嘉賓，JFYT亦化身特種部隊台上合體。
YT嘅個唱周五展開，佢對自己首個紅館演出極為重視，不論舞台、歌曲編排同製作上都花盡心思。舞台呈「工」字型，盡量接近更多台下觀眾。演唱會一開始，大螢幕上就播出影片，片中YT駕駛電單車飛馳到紅館附近。而此時YT就同鐵騎徐徐升上舞台，身穿銀黑色Jacket嘅佢型爆登場，以一曲《上場》為演唱會揭開序幕。
今次個唱當然唔少得JFYT合體現身，成員以特種部隊造型登場，獻唱《Syndicate》，不過最搞笑係獻唱後，鏡頭拍攝各人大特寫，成員分別擺出chok爆甫士，又喘氣深呼吸，令台下觀眾爆笑歡呼。JFYT仲以韓文自我介紹，笑言接到任務要到場尋找YT。
YT好友Tyson Yoshi亦有登場，兩人合唱《1994》，Tyson仲笑言：「呢個月喺紅館唱咗三次《1994》，今晚終於同周殷廷唱。」YT仲發現《1994》MV女主角 雲浩影 於台下，Cloud口震震話：「我嚟睇Show㗎咋！」YT亦感謝好友Gin Lee 、Gareth.T都捧場。而Tyson更二話不說答應任嘉賓。
Tyson笑說：「唔敢得罪佢呀，我重有外傳未拍，做歌手想唱紅館好易，識啲開紅館嘅人咪得，我今個月第三次喇！飲奶茶使乜自己沖㗎！」又向YT送上一架模型車作為禮物，之後Tyson再唱新歌《追CHASING THE WIND》。
YT其後換上金色外奪現身大騷胸肌，唱出多首受歡迎歌曲，好似《遲了悔改》、《意外現場》，演唱會尾聲時佢特別感謝朋友、家人、fans給予機會繼續唱歌。最後更獻唱從未曝光新歌獻予在場歌迷。
