荷里活「狂人」 湯告魯斯(Tom Cruise)再次挑戰極限，拍戲向來以「搏命」著稱嘅佢，過往於《職業特工隊》系列多次親身挑戰徒手攀懸崖、於飛機外飛翔等危險動作，甚至於《壯志凌雲：獨行俠》中親自駕駛戰鬥機。
呢位年逾六旬嘅型佬依然毫無退意，正式宣佈將為佢1990年主演嘅經典賽車電影《雷霆壯志》(Days of Thunder)拍攝續集，並暫定2028年暑假上映。
今次佢將同荷里活女神 安妮夏菲維(Anne Hathaway)合作，兩人同步於社交平台發文，上載於NASCAR賽道上嘅合照，為呢部36年前大作續集預熱。今次型佬湯將再扮演經典角色「Cole Trickle」，繼續於賽道上挑戰極速；而同佢首度合作嘅安妮夏菲維則打破以往形象，飾演年少有為嘅賽車隊老闆兼工程師，兩人於競速賽場上並肩作戰。
提起1990年嘅《雷霆壯志》，最令人津津樂道嘅莫過於係型佬湯同前妻 妮歌潔曼(Nicole Kidman)嘅定情之作。當年兩人戲假情真，後來更步入婚姻殿堂，成為90年代荷里活最矚目嘅金童玉女。
儘管早已年逾花甲，不過型佬湯對親身挑戰極限嘅執著似乎仍未減退，外界關心佢會否於新片中再次親自駕駛賽車衝鋒陷陣，而更有消息指出，身為男主角嘅佢早已做好實戰準備，令人更為期待新作。
