一代歌后梅艷芳嘅媽媽 覃美金 今日於寓所離世，享耆壽102歲，多年來「梅媽」覃美金嘅動向備受外界關注。逾百歲高齡嘅佢除咗於幼女梅艷芳離世後，與長子梅啟明多年來一直為遺產與執行人打官司，其實一生都經歷波折，由早年帶着女兒賣藝維生，到後來捲入長達數十年遺產風波，人生高低起伏比戲劇更加戲劇化。
梅媽覃美金早年喪夫，獨力撫養四名子女，當時因家境貧困而一手創辦「錦霞歌舞團」，年僅約4歲嘅梅艷芳同姊姊梅愛芳亦被迫輟學，於荔園同啟德遊樂場等場地登台獻唱。雖然童年生活艱苦，不過呢段賣藝生涯，亦為梅艷芳日後嘅歌壇一代天后地位奠下基礎。
1982年梅艷芳參加新秀歌唱大賽奪冠爆紅，梅家家境亦大有改善，梅媽亦得以過上豐衣足食的生活。
直至2003年梅艷芳因病逝世，為防家人揮霍，早已特別成立信託基金，按月發放生活費予梅媽。然而梅媽與長子 梅啟明 對遺產安排極度不滿，自此展開長達多年嘅「爭產官司」。兩人屢次入稟要求推翻遺囑或提高生活費，最終均告敗訴，更因拖欠龐大訴訟費而雙雙被頒令破產。
過往梅媽與大仔梅啟明一直同一陣線相依為命，唯近年兩人關係嚴重破裂。電影《梅艷芳》上映後，梅啟明入稟高院指控電影公司侵權，加上後續爆出婚外情等負面新聞，徹底激怒梅媽。梅媽公開痛斥梅啟明「財迷心竅」同包二奶，更於2022年登報正式與梅啟明斷絕母子關係。此後梅啟明一直被禁止探望，母子情斷，亦為呢段錯綜複雜嘅家族恩怨再添一筆唏噓紀錄。
