周殷廷 一連兩場《The Alchemist Live 2026》演唱會尾場周六晚圓滿結束，YT分享當年參加選秀節目被淘汰嘅「黑歷史」片段，更邀請當年評判 杜德偉 擔任嘉賓。Alex笑言怕被「尋仇」，場面爆笑。
YT一開騷就連獻唱《上場》、《Killa》同《小姐你好》三首快歌，仲霸氣叫觀眾：「全部同我起身！」璞迷亦響應揮動着螢光棒瘋狂舞動。同時擔任個唱導演嘅YT，拍攝多段短片穿插演出之中。獻唱多首歌曲後，佢喺台上話：「歡迎大家來到….」話口未完就連中幾鎗，電影感演出令觀眾嘩然。
YT早年曾參加台灣選秀節目《超級星光大道》，現場亦播出比賽片段，YT分享當年隻身赴台比賽感受，更坦言唔敢翻睇影片，更覺得自己當時好失敗。
佢話當時係首次參加公開比賽，晉身百人初選，當日心情驚慌，結果等足8小時就唱得30秒，被淘汰後爆喊，非常怕自己無機會再唱歌。之後再唱出當年參賽歌曲《我要好好過》。他坦言想了很久如何分享自己的故事，如何分享埋藏心中好脆弱及不敢跟人講的感受，很開心今次跟大家分享。
YT失敗故事仍有後續，佢於後台見到其中一位評判離開，更㩒住對方嘅車話：「你好呀！我叫周殷廷，我想話比你知我係第100個，我終有一日我會成功做歌手。」當時對方回應話：「好呀，你加油！」YT指失意時有好多人鼓勵，對方聲音非常重要，更感謝對方擔任嘉賓，此時杜德偉緩緩升上台，兩人合唱一曲《無心傷害》。
Alex由外地專程趕返港現身，YT就對佢講：「有句說話我想親口同你講，I get my promise！」Alex就指：「能成為你嘅版圖其中一塊非常榮幸，當日有幾多人話唔鍾意你，講咩都好，上到台都係你自己功勞。」
YT再笑問當日點解會被淘汰﹐Alex就笑言：「今日原來唔係搵我做嘉賓，係尋仇。我話唱《信自己》，後尾話唱《無心傷害》，即係話我無心傷害咗你！你依度全部都係你嘅歌迷，冧我好大鑊！」
大螢幕再重睇當日比賽畫面，Alex就見到自己原來無份淘汰YT：「我有眼光，有撐你㗎！咁靚仔跳舞又好睇，又性感，又胸肌又腹肌，真係唔簡單㗎！見到你張相我都流口水呀！」
YT又親手送上新專輯予Alex感謝，Alex笑說：「我想講返件事！當日周殷廷帶咗個電影劇本來搵我，隔幾日佢打嚟問我做唔做佢演唱會嘉賓。死啦！如果我唔做嘉賓，咪冇戲拍？所以我應承咗你啦！」
而唱畢《三生有幸》一曲後，YT又分享趣事，佢指早前收到一個訊息，指老公好鍾意聽自己唱歌，希望於婚禮獻唱《三生有幸》。YT笑言：「婚禮唱有啲奇怪，佢就係Michelle(衛詩雅)，今日我好朋友周師兄(衛詩雅老公)都有嚟！最後我係唱咗《My Everything》嘅！」 到演唱會尾聲，YT分享過去叩門求當歌手嘅檔案，當中有舊相片，更有過去嘅肌肉照，最後以從未曝光新歌結束尾場演出。
