森美 出席電台台慶，眨吓眼佢就效力電台超過三十年，而森美同公司上下老中青同事都打成一片，多年嚟都相處融洽，森美近年夥拍新一代DJ合作，令佢更添活力，睇見公司唔同年齡層嘅人都共同努力，森美話就好似TVB一樣，笑言有三代同堂嘅感覺。
森美主持嘅節目《唱錢》踏入尾聲，佢話其實即使歌手上嚟挑戰節目都會老貓燒鬚，因為啲歌曲原唱都冇可能唱到一模一樣，連小肥咁唱得都要挑戰兩次就知啦，節目係有佢好玩之處，希望好快會有新一輯同觀眾見面。
森美19歲大嘅學霸囡囡，9月中就要到英國修讀碩士課程一年，森美同老婆都好唔捨得，距離女兒出發仲有兩星期，森美要全力安撫老婆，因為阿女係第一次去外地留學，作為父母難免會擔心，之後兩夫妻可能會多啲前往英國探望，森美笑言視女兒出國為兩老人生大事。
