曾經先後出戰《聲秀》同《魔音女團》選秀節目嘅 穎喬 ，正式出道成為女歌手，呢日佢接受《StarTalk》 許文軒 專訪，透露童年時已經對唱歌充滿濃厚興趣。
Ziva早喺3歲時已經好鍾意唱歌，其中一個原因係受媽媽鍾意音樂影響，由細到大都被音樂沉浸住，仲記得第一首完整唱晒嘅歌係Westlife嘅《My Love》。Ziva中三時已立志想做歌手，仲喺校內參加歌唱比賽獲得冠軍，亦係佢人生首次面對咁多觀眾。
到成長後佢到台灣發展前，曾經喺香港做模特兒，半隻腳踏足娛樂圈，當時台灣香港兩邊走，持續兩年，喺臨簽約出道前發生COVID，一切被迫暫停，之後留港發展，但Ziva從未諗過放棄念頭，參加大小比賽累積經驗，憑住倔強同好性嗰份堅持，加上自己嘅主動，終於正式出道。
Ziva透露喺一次大型活動上夥拍IdG Bubbles演出，之後Ziva主動向女團主腦阿拔自薦，想一齊跟IdG Bubbles集訓，點知願望成真，到推出第一首新歌都係自己爭取。
由揀歌到拍MV及至新歌推出嘅過程，Ziva都好感動，因為歌名取名《我的心稍微大於一整座宇宙》，喺阿拔刻意將Ziva曾經參賽嘅Solo歌名轉化為歌詞，一聽到之後即刻爆喊，一幕幕回憶片段湧現，到拍MV時又要面對喊嘅場景挑戰，Ziva花咗兩星期醞釀情緒，但到臨場一刻只要一諗起阿拔同首歌嘅意義，就咩都唔洗講即喊，仲一次喊得比一次勁。