《2026香港小姐競選》圓滿落幕，最後由1號袁絲珩封后得冠軍、亞軍係8號鄧匡閔、最上鏡小姐同季軍都係2號 李澤欣 囊中物，友誼小姐則係3號李澄晴。
冠軍袁絲珩今年26歲，職業係演員，Bernice整晚表現亮眼，尤其喺問答環節對答清晰口齒伶俐，才藝表演環節以跳舞取勝，佢曾經講過參選後減磅，破咗佢讀書時期嘅紀錄，現時係佢人生最fit嘅時候，喺泳裝環節上見佢身形的確比參選時瘦咗又fit咗近乎完美體態。
比賽期間12位佳麗分別經8強及4強兩輪淘汰，最後跑入四強分別係1號袁絲珩、2號李澤欣、6號盧蔚晴、8號鄧匡閔，賽事競爭激烈，四強喺發表感言時都好感觸，袁絲珩更忍唔住爆喊。
選美最吸晴嘅當然係泳裝問答環節，今年大會以冬雪為主題，佳麗除下毛毛外套後以超性感三點式泳裝火辣示人，個個都身材fit爆。一對一PK答同一條問題，對答內容精彩有趣。
12位佳麗呢晚落力演出競賽，首先由 李幸倪 帶領一眾佳麗揭開序幕再自我介紹，隨後由 曾比特 率領佳麗以中國風晚裝主題出場，盡東方女性魅力，然後接受四位司儀 蕭正楠、馬國明、曹永廉、 陸浩明 同 鄭衍峰嘅答問。
仲有 張與辰 、魔音女團MYNT演出，其中8強喺MYMT歌舞環節上進行跳舞Battle氣氛辣㷫全場。最後壓軸由 梁漢文 聯同 郭柏姸 、陳楨怡 同 謝淑怡 幾位音樂才女，上演精彩嘅音樂愛情故事，四人合力展現音樂才藝，一同演繹Edmond嘅金曲。
