上星期剛開完音樂會嘅 衛蘭Janice ，宣傳將於11月喺紅館舉行一連三場《衛蘭OUT OF FRAME世界巡迴演唱會》香港站，呢次演唱會除咗係見證Janice出道20週年外，亦係佢首度以「獨立音樂人」姿態登上紅館嘅個唱。
呢次巡迴演唱會已經去過14座城市，而嚟到香港站，Janice將升級舞台製作，並重新編排演出，Janice 表示一直希望巡演嘅最後一站可以喺自己屋企— 香港 舉行，佢指早年自己離開咗唱片公司，跳出自己嘅舒適圈成為獨立歌手，所以喺巡演上佢都宣揚呢個訊息，話畀大家知可以跳出舒適圈去做自己鍾意做嘅事。
回想自己第一次喺紅館開騷嘅經歷，Janice表示：「當時我出道兩年之後便可以在紅館開演唱會，感覺真的很瘋狂，不過已經忘記很多細節，我只是記得自己好緊張。真的好期待今次香港個唱，因為我好愛香港的觀眾，好期待唱歌給大家聽。而我希望我的演唱會可以多些跳舞部份，跳舞真的好好玩，我很想唱多些快歌，把個唱設計成一個Party，因為我演唱會實在太多慢歌了。」
Janice指巡唱已經去過14個城市，每一站都畀佢唔同印象，不過其中有一站嘅經歷就相當爆笑：「有一站有很多飛蟻，我很害怕唱歌時它們會飛入我的嘴內，所以我把咪高峰好貼近的對著嘴，以防飛蟻飛入口內，我還要用對手 Fing 開它們，我聽到台下觀眾在笑，想起都覺得好Funny。」
自言係典型「I人」（內向者）嘅Janice，性格內斂且不善言辭，但鍾意透過音樂將內心情感傳遞。喺過去嘅巡迴演出期間，Janice坦誠分享自己克服舞台焦慮嘅心路歷程，佢用真實嘅經歷勉勵樂迷：「無論好與不好，都是寶貴經驗。Just move on，可以繼續唱歌給大家聽已經很滿足。」Janice期待透過呢場音樂之旅，鼓勵大家勇敢走出自己嘅舒適圈，跳出固有框架，擁抱未知嘅自己，大膽追尋屬於自己嘅夢想。
