《2026香港小姐競選》圓滿落幕，決賽夜台上佳麗表現精彩，一眾表演嘉賓同司儀們都好戥12位佳麗緊張，首次挑戰港姐司儀嘅馬國明對自己嘅表現好滿意，尤其係講「轉頭見，同出年見」完全冇搞錯，更自封喺幾位司儀中係男神擺設。蕭正楠笑言聽講台慶都會搵返佢哋三位做司儀，馬明即刻怕怕表示都係「轉頭見，同出年見」。阿蕭同曹永廉嘅上衣同樣開胸，被馬明取笑佢哋同港姐抗衡。
梁漢文同郭柏妍、陳楨怡、謝淑怡聯手表演音樂劇氣氛激昂，唔知Rosita係咪面對唱歌緊張得滯，其中一幕Edmond拖住Rosita唱《七友》時，Rosita突然疑似自踩裙擺差啲出事，好彩得到Edmond嘅拯救先避過一劫，令Rosita都好驚險話：「好多謝Edmond，如果唔係就會突然間有個白色嘅嘢跌咗喺台到。」
李幸倪同師弟曾比特分別率領佳麗上演歌舞，阿Gin已經第二度擔任港姐嘉賓，佢覺得呢晚表演嘅歌曲好貼合港姐主題，期待下次成就解鎖晉級做司儀。
魔音女團成員中嘅宋宛穎、倪樂琳同莊子璇都係港姐冠軍，佢哋都冇諗過會以女團身份重踏港姐舞台，睇見一眾師妹們嘅演出都覺得好特別，Hilary最欣賞12位佳麗喺冬雪主題嘅泳衣環節，顯現不一樣嘅性感姿態，而Sabrina同Ellyn則最鍾意佳麗刺激辯論，認為可以考到佢哋嘅急才，又不失友誼先最難能可貴。
另外喺比賽前無綫集團有限公司行政主席許濤，率領一眾管理層踏上紅地氈，仲有歷屆港姐嘅師姐盛裝打扮嚟睇騷，幾位有份擔任今年港姐外景嘉賓嘅大師姐馮盈盈、黃嘉雯、陳懿德都高貴優雅現身為師妹打氣。
早前德德被網民捕獲同羅天宇恩愛睇騷，令兩人戀情浮面，德德大方甜蜜回應拍拖消息，自揭兩人感情穩定，唔介意情侶檔工作搵錢。
