《中年好聲音4》日前圓滿落幕，呢日七強歌手同評審 肥媽 海兒 等現身見面會，加上師兄 黃劍文 同 劉洋 與一眾歌迷見面，而大家亦先後現場為大家獻唱，非常熱鬧。
已正式加入樂壇一段時間嘅Kimman同劉洋，見到新一屆成員都非常開心，仲話佢哋嘅新作已經準備當中喇。劉洋第二首作品即將推出，係粵語歌曲之外更係一首跳舞作品，佢仲搞笑話一面對鏡頭就唔敢講廣東話，非常擔心會講錯變粗口呀。而Kimman同樣正籌備新歌，仲話節奏會比舊作更強勁。
完成近十個月比賽嘅《中聲4》朋友，終於可以鬆一口氣，而 鄭家聲 就話有計劃返加拿大探親休息，仲話有可能辦一個小型見面會喎，仲提到將同戰友推出合唱歌呀。至於 尹景順 就指會返大馬見鄉親喇。
吳亦偉 亦話自己要苦練廣東話，將比賽期間嘅各首廣東作品字正腔圓咁重新為大家演繹，仲預告同劉洋會合作一個非常搞笑嘅計劃喎。至於幾位為比賽一直Keep Fit嘅女士，就話要解放好好盡情嘆美食喇。
