《2026香港小姐競選》決賽12位佳麗經過才藝同口才考驗之後，最終由芳齡26歲嘅 1號 袁絲珩 奪得冠軍，亞軍得主係 8號 鄧匡閔，而 2號 李澤欣 除咗奪得季軍之外，同時獲選為「最上鏡小姐」，而「友誼小姐」就由 3號 李澄晴 奪得。
無綫集團行政主席 許濤 賽後為得獎佳麗頒獎以及送上祝賀，佢讚 袁絲珩Bernice 喺問答環節答得好好。全晚表現亮眼嘅Bernice，喺第一個單字考驗環節中已經先聲奪人，能夠登上冠軍寶座佢都話唔敢相信，直言宣布賽果時自己係一片空白、難以置信，當下所有情緒一次過湧晒出嚟。
至於講到最滿意嘅部份，佢都指單字環節，畀自己嘅反應嚇親自己。而 鄧匡閔 亦表示好難以置信，因為佢話冇諗過自己可以入到三甲，仲話入到四強時已經好驚訝，仲話好戥冠軍Bernice高興。
而被視為大熱嘅李澤欣僅得季軍，問到佢覺得自己輸蝕咗喺邊？李澤欣即時發揮口才，指覺得自己冇輸，而係其他佳麗更優秀。奪得「友誼小姐」嘅李澄晴，就感謝大家畀呢個獎佢，仲話自己係代表大家奪得呢份友誼。
謝天華 伍允龍 苟芸慧 同 陳美齡 四位最上鏡小姐評審，大讚佳麗門水準高，而整晚嘅賽果都係佢哋嘅心水之選。Bernice嘅父母全程睇住囡囡嘅表現，賽後仲第一時間分享感受，袁爸爸讚囡囡夠淡定，講嘢冇㪐㩿，而袁媽媽就因為囡囡公開道歉而搞到眼濕濕，袁媽媽就話希望囡囡可以喺TVB發光發亮，享受屬於佢嘅舞台。而當Bernice返到屯門嘅住所，一大班同事好友就拎晒應援物喺現場等候送上祝賀，而未有到場嘅朋友，都有寫低字仔祝賀，見到呢班最強後盾，Bernice都忍唔住落淚。至於講到父母因為自己嘅說話而感動落淚，Bernice就話醉時大家比較內斂，好少將「Love You」呢啲說話掛喺口邊。
而經過一晚嘅休息，四位出爐港姐就返到電視城會見傳媒，Bernice表示仍然難掩興奮心情，鄧匡閔話賽果出爐後，自己電話入面有成500幾條短訊，到第二朝都未覆完。而李澤欣就指朋友們有錄低佢嘅演出再send返畀佢，不過佢就仲未得閒回覆大家呀。李澄晴就指自己賽後同家人去咗食辣蟹慶祝。
