郭柏妍（Rosita）自2020年港姐季軍入行以嚟，由生澀演技到近年演技尋求破格嘅蛻變過程，一改以往嘅乖乖女框架，喺《夫妻的博弈》飾演「最強綠茶」潘雪文，仲喺《2026香港小姐競選》決賽親自吹奏表演，展現多才多藝一面！
myTV SUPER《夫妻的博弈》最強綠茶喪子
郭柏妍擅長演奏單簧管，早前喺港姐決賽親自吹奏表演，憶起15年前第一次隨Marching Band參與TVB演出嘅童年往事，更笑稱當時自己「有個大肚腩」，與一眾團員喺TVB洗手間，興奮換衫同拍照留念。郭柏妍話當時一齊表演的確冇咁緊張，有時候Miss咗一、兩個都唔係好覺，最希望就係一粒音都唔好Miss，同埋高音唔好走音。
郭柏妍喺港姐決賽未開show前，練習嗰陣先記得有10年冇真正表現過，睇落佢為咗今次表演落咗唔少苦功，而郭柏妍喺演技方面同樣好落力，郭柏妍噚晚播出嘅輕鬆愛情小品劇《夫妻的博弈》，演繹喪子「無聲泣訴」演技大獲好評，網民大讚佢擺脫花瓶角色。
噚晚講到郭柏妍飾演嘅雪文將自身不幸歸咎於幸如，二人拉扯期間，幸如唔小心推跌雪文，雪文入院後向老公哭訴流產，令幸如非常內疚，原來係雪文「自導自演」，其實雪文搵幸如晦氣前一晚，被親母淑冰苛索金錢，雪文急步避開貪錢母親期間，不慎叉錯腳跌倒導致小產。
郭柏妍演技大獲好評，將「動」與「靜」嘅傷心神態演繹得淋漓盡致，郭柏妍先喺醫院得知胎死腹中後，即激動質問醫生，當醫生要佢做流產手術時，更崩潰得不停大嗌「我唔做呀」，另一場戲講郭柏妍返屋企獨自喺睡房望住BB用品，一臉哀愁；當她拿起BB鞋，終於忍唔住喊出嚟，純粹靠眼神、表情與肢體動作去表達悲傷之情，唔少網民大讚佢演技有進步，成功擺脫花瓶形象。
郭柏妍演技備受認同，獲讚完美演繹「綠茶」自私又可悲嘅性格，亦有網民鍾意睇佢與野蠻奶奶嘅「婆媳大戰」，郭柏妍剛小產出院，要求林漪娸出外買補品，然後更改門鎖密碼，讓尿急嘅「奶奶」被鎖在門外，心「急」如焚搵開鎖師傅上門，郭柏妍見兩人入屋即扮友善，林漪娸嬲爆衝入廁所，令夾在中間嘅張頴康亦激到失控，喝令兩女唔好再嘈，林漪娸被激到無言。
林漪娸飾演「野蠻奶奶」貪小便宜、說話刻薄兼使人唔使本嘅性格，如今竟被「綠茶」郭柏妍糟質，可謂一物治一物，郭柏妍呢次將「綠茶」角色演到入血，成功反客為主「玩謝」奶奶，讓唔少觀眾睇得痛快。
《夫妻的博弈》踏入結局周，高海寧復仇大計逐漸實現。預知夢中，高海寧與張頴康結婚後慘遭癌病折磨，熟睡時更被對方偷偷轉走金錢，呢次不幸已成功轉嫁到郭柏妍身上。
張頴康因炒燶股票而走投無路，趁郭柏妍熟睡時想偷錢，點知老婆係用指紋解鎖，張頴康捉住對方玉手想解鎖，點知郭柏妍「反瞓」，左手一揮便摑咗老公一巴，最終張頴康仍成功過數，正當佢繼續check對方電話有冇其他銀行戶口，郭柏妍已驚醒更儼如女鬼般披頭散髮靠近問老公喺度做乜嘢，想知郭柏妍係咪被轉走「身家」？貫徹「賤男本色」嘅張頴康仲有咩賤招，就要睇逢周一至周五晚8點30分於翡翠台播映嘅《夫妻的博弈》啦！
《夫妻的博弈》逢周一至周五晚8點30分翡翠台播映