9月1日就係充滿朝氣嘅莘莘學子開學日子，一眾星二代同樣迎接新學年嘅開始。陳家樂同連詩雅早前忙於為囡囡星星考學校而忙到冇停手，家樂當日仲笑言好似佢自己考學校一樣。
眨吓眼，兩歲大嘅星星就要開展校園生活，始終係第一次返學，小朋友當然要啲時間適應，星星都唔例外，全程箍實爸爸，怪不得家樂喺社交平台寫上「唔知星星咁唔捨得爸爸仲有幾多年呢」，又話一個同自己冇咗關係20年嘅日子（開學日），由今日（9月1日）開始，未來20年又再同佢扯上關係啦！
同樣為仔女開學而做足準備嘅周吉佩，佢開心同仔女影合照，而湯怡同老公麥秋成都記錄囡囡麥QQ開學情況，湯怡話做一對從不缺席嘅父母，囡囡眨眼已經K3，而老師向佢表示今年功課同上年差唔多，麥QQ而家會自動自覺去做，令佢好放心，爸爸就繼續努力同QQ溫習，兩夫妻分工合作。
