林盛斌（Bob）喺澳門正式展開世界巡迴棟篤笑首站，為咗配合主題「搏命」，阿Bob就以拳擊手裝束現身，仲瞓身演出三項需要經過專業訓練嘅驚險特技動作，不過大家最期待當然係佢幽默又貼地嘅港式笑話。
阿Bob回顧自己嘅奮鬥史，並以14字座右銘總結多年來嘅高低起跌「襟撈、願做、無投訴、肯捱、肯博、肯蝕底」，佢覺得人生公路長路漫漫，只要肯堅持、肯付出，目標明確，一定會走出屬於自己嘅路。 除此，Bob又化身苦主，分享生活喜感，大談追債奇觀同令人好嬲又好笑嘅奇人奇事。Bob精闢拆解夫妻關係同男人間嘅日常互動，大爆看似滿載愛意、實質全部廢話嘅幽默對話，精闢金句連發。
演出尾聲，Bob帶嚟壓軸驚喜，佢將日本經典劇《阿信的故事》主題曲重新改編為《信》，大螢幕亦即時首播歌曲MV。Bob喺MV裡面化身各行各業，並喺管弦樂團現場伴奏下，以動人歌聲唱出不屈不撓嘅阿信精神，藉此鼓勵大家學懂向命運說不。
