陳展鵬為TVB玄學競賽節目《玄戰》做首集嘉賓，嚟到集合玄學高手嘅場地，展鵬把握機會問問題，喺節目花絮中，一眾黑先知都算出展鵬一家有望年尾傳二胎喜訊，黑先知們更指係添丁。
展鵬第一個反應就係話唔可以俾阿女「小豬比」陳諾瑤（Quinta）知道，因為佢想要妹妹。事後展鵬表示是否有喜訊或BB性別與否都唔重要，凡事最重要係積極向前行，任何事都會開心。
展鵬喺節目中，向一眾黑先知出題，要各位算出佢喺2021年經歷過咩事，過程中亦令佢首度公開一段內心秘密往事，原來佢喺2019至2020年期間，簽咗一份廣告合約，廣告商先支付三分二酬金。由於疫情關係未能履行工作，而展鵬將千萬酬金買咗第一層樓畀媽咪。
雖然合約未有寫明要展鵬退款，不過佢同廣告商洽談，分五年歸還千萬酬金，結果佢成功完成承諾，展鵬承認當初有壓力，但佢選擇以豁達心態去面對，一切事便變得順利解決。
