馬國明呢日竟然撇低蕭正楠同曹永廉兩位好兄弟，單飛走咗嚟成都同當地粉絲見面，其實呢次fan meeting本身係喺八月頭舉行，但當日天氣問題而被迫延期，呢晚總算順利舉行，馬明同粉絲都過咗一個好開心又難忘嘅一晚呀！
馬明過去以「一歌走天涯」聞名，近年苦練唱歌，呢日深情獻唱《愛情影畫戲》、《發現》同《當我知道你們相愛》，明顯唱功躍進。
馬明首次喺成都舉行粉絲見面會，自爆之前曾擔心冇人嚟，但呢晚見到全場座無虛席，馬明覺得好感動，仲話有粉絲而家26歲，呢位粉絲8歲時已開始睇佢嘅劇集，而有啲粉絲仲帶埋囡囡嚟撐場，得到咁多朋友多年嘅愛戴，馬明亦好感恩啊。
馬明難得同成都粉絲見面，佢好盡力用港式普通話同大家傾下偈，馬明話自己嚟到成都，有品嚐呢度嘅口水雞，自爆自己唔食得辣，但有次喺四川拍劇時，放飯見到碟碟菜都係辣，只有白飯係唔辣。
