鄔友正為佢創辦嘅品牌拍攝一共十集，每集兩分鐘嘅短劇《魔幻百變床褥》，鄔生同太太翁嘉穗、有份演出嘅《魔音女團》MYNT成員，以及一眾台前幕後，呢晚約埋一齊食飯睇首播，大家都睇得好開心，鄔生見到自己嘅演出，仲興奮到拍晒手。
鄔生呢次又拍劇又獻唱主題曲，佢話要一圓夢想，背後要有好大勇氣同決心：「我以前係唔唱歌，同埋係唔鍾意唱歌，咁我71歲嗰年，我發覺原來唱歌對身體好好，咁就開始唱歌，越唱覺得唱歌越好玩，就一路唱落去，咁就好難得TVB畀機會我唱首主題曲，咁唱完主題曲，我覺得我完全踏出第一步。」
鄔生仲話歌詞內容好似講緊佢人生前半段嘅心路歷程，令佢勾起好多昔日回憶。鄔生又表示拍劇時，曾經有後悔一刻，因為佢話自己做工廠，點解要嚟拍攝搞到自己又尷尬又怕醜，後嚟諗通一點，就係佢身為品牌代言人，係有責任同品牌宣傳，無論拍出嚟嘅效果好與壞，佢都唔介意。
鄔生呢次成功解鎖新體驗，佢嘅自信心指數直線上升，呢晚佢仲拋出另一個震撼彈，就係佢想有朝一日舉行巡迴演唱會，佢好希望成為「歌壇姜子牙」，能夠喺80歲踏上啟德舞台開騷。除咗鄔生有咁大突破之外，魔音女團幾位靚女喺劇中亦都大曬演技，不過佢哋個個都話冇壓力，仲話拍得好過癮添！
