周殷廷一連兩場嘅紅館演唱會圓滿落幕，首次踏上紅館舞台嘅YT，呢次更出動私伙電單車，並以閃爆嘅銀黑色Jacket型爆登場。
YT首場就請嚟好友Tyson Yoshi做嘉賓，而嚟到尾場，佢就搵嚟前輩杜德偉（Alex）撐場，YT邀請Alex做嘉賓，原來係因為YT未出道時，曾經喺台灣參加選秀節目可惜被淘汰，當年Alex就係其中一位評判，YT請Alex嚟並唔係尋仇，反而要報恩。事關當年有三位評判畀咗「X」YT，唯獨Alex冇按掣，YT大讚Alex識貨。
YT諗起當年被淘汰後，曾經沮喪到喺後台喊，之後喺街上突然見到Alex，YT衝上前向對方表示「我就係頭先第100名選手，我個名叫周殷廷，我想同你講終於有一日，我一定會成為歌手」，YT表示嚟到今日，佢感激Alex畀佢機會完成呢個旅程，成為拼圖上最後拼圖，令YT覺得成件事好圓滿。
YT事業得意，感情生活一樣都咁得意，好似呢兩晚YT嘅女朋友都有嚟捧場，以行動送上支持，YT話冇刻意收埋女友，身邊朋友及粉絲都知佢拍拖，對於記者問到點解唔喺紅館求婚，YT就笑指記者太進取。
