江美儀率四位男神朱敏瀚、張振朗、吳業坤同GM曾展望主持嘅新一輯《試真D唷》，將會喺9月6號晚首播。宣傳活動上，美儀姐同男神們分享返拍攝嘅趣事，佢哋今次喺台北同台南等城市捐窿捐罅探店，食盡平、貴美食，由幾蚊食到幾萬蚊都有，當中銅板美食係令美儀姐印象最深刻。
美儀姐喺第一輯節目時已經大讚朱仔又有風度又乖仔，今輯加入咗振朗，美儀姐都對佢讚不絕口，相反坤哥同GM就繼續激到美儀姐紥紥跳，GM話坤哥不停挑戰美儀姐，而振朗亦唔係想像中咁乖，同屬曳豬一名。
喺活動上，美儀姐唔單只大爆GM個人習慣立立亂，仲話幾個男仔晚晚收工都唔見咗人，第二日開工無精神，原來係因為坤哥習慣喺唔同地方都要試吓飲當地調酒，所以就拉埋班拍檔去品酒。
