近年居於中山嘅70年代一代武打巨星 陳觀泰 今晨離世消息，享壽80歲。消息由徒弟向同期邵氏朋友證實。
據與佢相交多年嘅邵氏舊友指，陳觀泰身體一向大致正常，上月仍與好友飲茶見面，當時未見異樣。豈料今晨接獲陳觀泰嘅弟通通知佢已離世，據指日前因腦出血入院留醫，今晨第二度心臟驟停，搶救無效不治。
陳觀泰早年拜大聖劈掛門名師陳秀門下，憑紮實真功夫1969年勇奪首屆東南亞國術比賽輕量級冠軍。隨後佢獲一代武俠電影大師 張徹 賞識簽約邵氏，1972年已擔正主演電影《馬永貞》，將硬朗身手與拳拳到肉打鬥風格展現得淋漓盡致，當時更締造票房佳績，又引領出隨後數十年嘅港產功夫片風潮。
此後陳觀泰曾先後演出《刺馬》、《五虎將》以及後來於麗的電視嘅經典劇集《大地恩情》等名作，奠定港產片「硬漢」代表地位。
後來港產片轉型，陳觀泰逐漸淡出幕前，與現任妻子移居中山過半隱居生活。幾年前佢曾患上血液疾病（紅白血球失衡）險喪命，經調理後逐漸康復。熱愛演藝事業嘅佢雖年事已高，不過仍心繫電影，晚年偶爾回港客串如《打擂台》等演出，又參與幕後工作外，更有意於內地開設影城。
