第三屆香港「Global 6K for Water」明年1月10日於西九文化區再度展開， 陳國邦 童星 徐立德 同YouTuber柿柿 一同為活動擔任大使，早前佢哋已拍攝宣傳片同海報。
向來喜愛跑步嘅「李斯」陳國邦，早前於個人社交平台以影片記錄240公里街跑過程，而成為呢次活動大使佢認為係非常巧合嘅緣份。孩童時期曾經歷過香港制水嘅佢話：「個個家庭一到供水時間，就盡量攞唔同器具裝多啲水。嗰時我住唐六樓，每次攞水都要上落六層樓梯，無論對大人定小朋友，體力消耗都係最大嘅難關。」佢仲話如果每日都要為食水擔心，已經係生存問題。
佢坦言城市人生活已經比較幸福：「如果有呢類型嘅新聞，我都會畀下一代知道，我哋而家擁有嘅，有幾咁幸福。」更笑言如果可以號召全港藝人拎水桶跑六公里作宣傳，相信能令更多人關注缺水問題。
而有逾20萬訂閱嘅YouTuber柿柿，希望能善用自身影響力，傳遞有價值訊息：「我了解咗呢個活動背後點樣直接改善小朋友生活嗰陣，就好想同大家一齊參與、體驗。今次係一個好寶貴嘅機會，畀我實實在在落場，感受嗰啲缺乏妥善水資源嘅非洲居民係點生活，希望可以令大家更關注呢個全球水資源嘅問題。」
柿柿期望透過親自挑戰6公里路程，令觀眾隔住螢幕，都感受到呢份重量：「六公里呢個距離好巧妙，唔太長又唔太短，係大家都有能力完成嘅目標！」
