佘詩曼 近年演完Man姐再演言官，唔止角色吸引，更深得廣告商愛戴。而凍齡有術一直容光煥發嘅佢，近日又有全新一輯廣告登場，阿佘以一身高貴銀色晚裝上陣，無論肌膚同身材都狀態極佳。
拍攝廣告當日，阿佘身穿一襲剪裁非常貼身露背晚裝，全程以唔同pose呈現弗爆體態；散發出既自信又從容嘅魅力，拍攝時小休更嘆大雞髀補充體力。 近日阿佘參演嘅經典劇集《使徒行者》於 TVB Plus 重播，再次重溫當年「釘姐」演出，仲將劇中搞笑感性一面同新鮮出爐廣告中嘅自信高貴對比，更有留言大讚：「阿佘個樣真係冇變！」、「釘姐變Man姐，氣場勁左，個樣冇唔同，奉勸啲女星個樣唔好搞咁多！」、「完全睇唔出相隔12年！！」
角色萬變但容貌身形不變，阿佘本人就笑言每個時期嘅自己都有唔同：「呢一刻我最鍾意係言官，因為配合角色，大家都會見到好淡妝，又冇華麗服飾配合，狀態好唔好一眼就見到！記得當時日以繼夜拍攝時，撞正流感高峰期，好多劇組手足都『中招』，不過我冇受感染。」
由「釘姐」古靈精怪到氣場全開，阿佘覺得自己已大為成長：「我更識得享受演每個角色嘅過程。我覺得唔需要太過分緊張歲數，因為每個人都有獨一無二嘅吸引地方，學識欣賞自己每個時期就好！我都會做運動，亦會少食多餐，同埋食補健品保持最佳狀態，都會食宵夜，所以保持心情輕鬆開心係好重要。」
《使徒行者》星期一至五晚 22:30 TVB Plus