許子萱 Cecca 當年於2022年度香港小姐一口氣勇奪亞軍、「國際親善小姐」、「最佳口才獎」、「最佳妝容獎」同「生態保育大使」五個獎項，雖然Cecca卸任後繼續學業，赴英國牛津大學攻讀工商管理系碩士課程，學成嘅Cecca未有放棄演藝夢，唔止參與內地唔同節目同作品演出，最近更跨界為內地劇集《直播女王》唱插曲，推出首支個人國語單曲《恒砂》。
《恒砂》已於多個音樂平台同步上架，歌曲以「砂」為意象，象徵微小但堅毅，即使身處洪流，仍能守住棱角。
Cecca首次錄製自己嘅單曲，坦言挑戰重重：「呢首歌真係十級難度。入錄音室前，我只係學咗三個小時就要錄音。首歌音域跨度大，情緒層次又多，每一句都要反覆打磨。作為新人，我唔識太多技巧，由第一次到最後一次，我感覺到自己有飛躍般嘅進步。每一次錄製我都用盡全力。」佢又希望大家都喜歡呢首歌，又話每一份鼓勵，對佢都非常重要。
Cecca當年挾高學歷參選，過往曾任職華爾街著名券商嘅金融分析師，近年佢積極於內地發展，擔任活動司儀之餘，亦演出多部作品。好似懸疑動作電影《群龍奪寶》同劇集《四大探長》、短劇《情謎情迷》等，最近更於劇集《直播女王》擔正，又獻唱劇集插曲。
