凍齡女神 陳自瑤 啱啱過咗45歲生日，日前佢上載咗一輯極具異國風情嘅靚相，一圓佢嘅西域公主夢。而日前佢又同好友 胡曦文 以及一眾好友一齊慶祝生日，派對主題更係充滿懷舊風，Yoyo亦喺社交平台分享咗多張靚相，著上黑白波點短裙嘅Yoyo戴上頭箍，少女味十足，喺鮮花同粉紅氣球襯托下，更係洋溢住幸福嘅氛圍。
Yoyo表示：「謝謝大家送我的祝福，全部收到了﹗感恩自己真的擁有很多，被滿滿的愛包圍著，太幸福﹗好開心，今年可以和我嘅好朋友胡曦文一齊慶祝生日﹗也祝大家身體健康，開心幸福﹗Love You all。」
喺照片中仲發現早前被影到一齊睇演唱會嘅羅天宇同緋聞女友陳懿德，亦都一齊現身生日派對，兩人更毫不避忌一齊企埋合照，兼著上同色tone嘅服裝，真係襯到絕呀﹗睇嚟兩位嘅緋聞真係越嚟越浮面。除咗佢哋兩位之外，同場參與派對嘅仲有樂易玲、麥長青、占士丁丁等，真係好熱鬧啊﹗
