許美琪 喺《中年好聲音4》賽事中，以第7名完成整個旅程，經過個多星期嘅沉澱，美琪喺社交平台發千字文，以《感言篇》為題，感激10個月來各界嘅鼓勵支持，亦自覺整個過程似坐過山車一樣，但無論結果如何一切都值得。
美琪先多謝老公支持追夢，正因老公一句想喺決賽見到佢，佢先每一輪拼盡全力。仲有遠道而來港見證佢踏上舞台嘅親戚朋友，千言萬語都表達唔到對大家嘅謝意。
美琪又話已經多謝過銀老師好多次，但無論講咗幾多次，佢都覺得唔夠。佢仲感激幕後嘅工作人員，為呢個節目付出咗無數嘅時間同心機。同樣Donald老師同Live Band嘅伴奏，令美琪覺得自己呢個素人都有難得嘅體驗。
另外，美琪亦多謝 車婉婉、評審們給予嘅鼓勵同寶貴意見，令佢進步，亦多謝 鄭衍峰 嘅悉心照顧。仲有 黃博 喺決賽後給予美琪擁抱同傾偈，令喊到失控嘅佢平復情緒，美琪為此都特別感激師姐。
講到要多謝嘅人，美琪亦唔會漏咗一班支持佢嘅粉絲，佢話自己係一個普通女仔，冇諗過會有咁多人認得佢，亦因為大家，令佢有正能量去繼續唱好每首歌畀大家聽。
最後，佢感激一眾《中聲4》戰友，佢話「由一開始到依家，我哋成為咗朋友，一齊度過咗美好嘅回憶。希望我哋有時間，大家再聚一聚。」美琪表示會繼續留喺香港發展自己嘅歌手事業。
