8月底去咗加拿大登台嘅陳山聰，先後踏足温哥華、多倫多、蒙特利爾三大城市，當地粉絲相當熱情，更為山聰大派利是，山聰都話今次收到嘅利是比佢當年結婚收嘅人情仲要多呀﹗除咗登台之外，熱愛跑步嘅山聰，當然都有趁空檔喺當地練跑，三哥苗僑偉同太太戚美珍，仲化身半個東道主，陪佢一齊跑步。
難得嚟到加拿大，山聰都有四周圍玩下，佢更喺社交平台分享佢喺多倫多遊覽嘅相片，相中所見，佢去咗古釀酒廠區嘅愛情鎖牆打卡，山聰話呢次行程雖然咩都無買，但就品嚐咗好多美食，好似必去打卡嘅「龍蝦山」、仲有體驗喺中餐廳食牛扒等等，真係好有食神啊﹗
山聰完成登台工作後，就可以專注陪伴啱啱升讀小一嘅囝囝Jaco開學啦，山聰嘅太太亦有喺社交平台限動，分享阿仔升格做小學雞嘅相片，就讀南區直資名校嘅Jaco，非常醒目，相信佢亦好期待展開小學嘅校園生活呀。
