車婉婉 郭羨妮 江美儀 魔音女團 甄澤權 黃德斌 黃又南 等現身一個頒獎禮獲得多個獎項。美儀姐主持節目《試真D唷》會喺9月6號首播，呢日佢榮獲電視女藝人獎，得獎後美儀姐都有啲成功之道分享，認為藝人要與時並進求變，知道巿場需要，否則很快會被淘汰。
另一位成功女性車婉婉就代表《中年好聲音》節目組領取最耀眼綜藝節目獎，佢同時兼獲最佳女主持，令婉婉又感性爆水煲。而佢有份主演嘅處景劇《三代同糖》出街後，好多拍攝場景引發討論，婉婉解釋其實劇組包括藝人都係試驗中，一直去改進，唔得就重拍，效率好快，團隊都想件事好，同時明白到上一個長達9年嘅處景劇已經同觀眾建立咗深厚感情，例如聽到丹爺把聲就係食飯，同肌肉記憶一樣，自己會盡力做好角色，將大家嘅意見化為動力。
魔音女團出道短短幾個月成功收穫人氣，仲獲得首個獎項「新晉女子組合獎」，喬美莎更兼獲新人獎，令佢哋喜出望外，莊子璇更以一口流利韓文說出感言。
早前魔音女團推出新歌《Turn My Magic On》MV，喺網上大受歡迎，MYNT憶起拍攝時都有好多趣事，宋宛穎期望下次女團可以有更多形象同觀眾見面，MV中只得兩套衫未夠喉。而倪嘉雯則笑指被監製下咗禁笑令，要求佢以好Cool嘅表情放電，自己嘅強係笑住好Cute放電，呢個舉動簡直極高難度。
Sonija 因爲早前有份主演嘅電影受歡迎，帶挈佢獲得人生首個電影獎項，現時女兒開始長大，令Sonija可以騰出更多空間工作，遇到心宜角色或劇本都會接，期待嚟緊多啲同觀眾見面。
