陳山聰 相隔6年再次到多倫多開騷，好友 林嘉華 于洋 同 張崇基 都有現身捧場，全場粉絲爆滿個個都爭住埋身同山聰集郵，眾多熱情粉絲更送上利是寓意山聰大豐收。
呢晚山聰獻唱多首歌曲氣氛熱鬧，特別係唱到憑《金宵大厦》封視帝嘅主題曲《今宵多珍重》時，山聰特別投入。呢晚除咗觀眾熱情支持之外，當地嘅巿長亦驚喜登場獻唱一曲《上海灘》似模似樣，令觀眾同山聰都好驚喜。
今次山聰同行仲有一位小師妹 柯雨霏 ，兩人同台合唱，Ophelia亦有Solo環節，事前都好緊張擔心表現會影響山聰，幸好都順利完成令Ophelia可以鬆一口氣，而山聰亦大讚對方表現同實力。
嘉華哥同山聰曾經合作過多套劇集《少年四大名捕》以及《飛虎》系列，兩人一段時間冇見，所以嘉華哥一定要嚟捧場，並希望一盡地主之誼帶山聰遊覽聚舊，可惜時間關係未能實行。
年屆78歲嘅于洋喺加拿大過住退休生活，早前佢接受咗心血管手術，身體已經完全康復，靠勤力做運動養生維持良好體魄。山聰同于洋合作過《金宵大厦》，難得山聰到加拿大，于洋一定要嚟見個面。
