演藝事業跨越半世紀，獲行內尊稱「Ming Sir」嘅劉兆銘於9月2號晚離世，享耆壽94歲，Ming Sir一生貢獻演藝事業，留下不少經典作品，除此佢對演藝事業嘅專業態度，亦感染不少後輩，備受各界人士尊崇。
劉松仁得知Ming Sir離世消息即發文悼念，松哥指前輩一句話對佢影響好大，這句話便是「勇捨多餘便多得」，之後再將「勇捨」改為「巧捨」，字一改就係兩個不一樣嘅境界。松哥憶述喺雲南工作時，一度感到迷失，感覺所有事都變成一片空白。回港後，佢將呢種感覺跟Ming Sir講，前輩一句「就是因為空白，你才可以隨意的填寫一些東西上去」，呢句話啟發到松哥，只要換個角度事情，產生完全不一樣嘅結果。
松哥憶述70年代喺TVB拍劇時，因為年輕、自我、唔鍾意交際，有時感覺自己好孤獨，有種同周圍嘅人格格不入嘅感覺。於是松哥同Ming Sir講「我在棚里有種很孤獨的感覺」，當時Ming Sir反問「你應該感覺自己是多麼突出」，瞬間讓松哥再想通，覺得Ming Sir厲害之處，係一句話就能讓人豁然開朗。
郭少芸與劉兆銘曾喺2001年TVB劇集《七姊妹》飾演父女，郭少芸分享一張同Ming Sir攝於2019年嘅相片，寫上「那天我們在咖啡店偶遇，度過了一段非常美好的時光…痛失這樣優秀的演員和良師，真的令人無比難過」。
蔡一傑亦感激Ming Sir帶畀香港人無數膾炙人口嘅經典角色同貢獻，希望佢一路好走，永遠懷念。何遠東曾經係Ming Sir學生，喺社交平台寫上「在學期間，聽到你寶貴的分享，每一句 都充滿對表演藝術的熱情，感謝您。永遠懷念，懷念你的笑容」。
