TVB處境劇《愛•回家之開心速遞》劇終情未散！9月3號就係呂慧儀嘅44歲生日，阿蟹喺社交平台分享多張照片，當中不乏早前分別同「熊家」、「接龍集團」成員嘅聚會合照！
阿蟹喺配文表示，今年生日唔再慶祝，呼籲粉絲們將祝福化為善心，可以捐款或做善事幫助有需要嘅人，亦希望大家凡事以善念包容，令生活加多啲正能量。阿蟹更感恩大家將佢放喺心上：「❤️農曆生日有熊家人陪我吃了壽桃包，蟹爸蟹媽蟹籽陪我吃了小蛋糕，還有我的好戰友的驚喜蛋糕，和蟹粉們提早很多的慶祝，這真心實意的情誼，已是我最珍貴的禮物。」
唔少《開心速遞》嘅劇迷紛紛留言向阿蟹送祝福，亦好開心見到一眾演員友誼不變。而喺阿蟹分享嘅合照可見，佢喺「熊家」成員聚會中同滕麗名鬼馬同「阿爸」劉丹玩自拍，丹爺更帶埋太太李馥瑩出席聚會。鮮有公開露面嘅李馥瑩保養得宜，驟眼望落只有六十出頭，打扮年輕且不失優雅，同丹爺表現恩愛。
