已故賭王何鴻燊之女何超瓊近日作客「奶茶妹妹」章澤天主持嘅節目進行長達107分鐘對談，超瓊罕見暢談家庭生活、創業再進入家族企業嘅經歷，以及同張國榮、梅艷芳、陳百強等巨星嘅友誼。
超瓊33歲創立嘅公關公司發展得如日中天，更憑一個地產推廣專案賺得600萬年收入，因此令賭王正式開口邀請佢返家族企業。不過超瓊並非一口答應，而係反問爸爸會出幾多錢糧。即使賭王表示係邀請超瓊加入董事局成員，並唔係做一個部門主管，超瓊都要問清楚資薪待遇。超瓊仲話當時根本唔敢向爸爸講自己賺咗600萬，驚爸爸認為佢高傲自負。
超瓊談及家庭生活，形容媽媽教育嚴肅，而爸爸就係救星。超瓊澄清外界曾傳出「父親唔准佢讀鍾意嘅學系」傳言，超瓊當年考上英國文學與戲劇專業後，爸爸只係同佢深入探討未來方向，最後自己選擇走向人生更大舞台。
奶茶喺訪談時拎出超瓊同梅姐、哥哥等巨星合照，大讚超瓊當年靚到可以選港姐。超瓊亦分享當年同自己最愛同一眾好友去Disco，大家重視聖誕、元旦等大時大節，往往會相約一齊玩，超瓊仲話：「不管你這個元旦聊天，你晚飯跟誰吃，吃完了大家就肯定會在舊文華東方酒店吃早餐。」超瓊同梅姐、哥哥等好友之間嘅慶祝元旦傳統，就係無論大家同邊個一齊都好，最後都要凌晨三點出現。
超瓊讚當年歌手性格真實，亦有帶領潮流嘅本事，形象冇刻意被包裝過，與現今世代「偶像」並唔一樣。佢亦失落感嘆呢一批朋友已經慢慢離開自己，宜家同自己關係親近嘅就有楊紫瓊。
