資深演員劉兆銘（Ming Sir）9月2日離世，享年94歲。Ming Sir近年深居簡出，甚少露面，晚年受七種慢性疾病困擾，出入靠輪椅代步，而日常生活就由家傭照顧。而喺去年10月出席香港文化藝術界慶祝中華人民共和國成立75周年酒會，就成為Ming Sir最後一次露面，當時Ming Sir坐輪椅現身。
Ming Sir縱橫演藝界超過半世紀，醉心舞蹈及戲劇藝術。Ming Sir喺香港土生土長，十幾歲為生計喺郵輪上擔任倉務員及打雜，亦因郵輪不時停泊喺歐洲、歐美等港口，令佢接觸到當地嘅藝術。
Ming Sir喺25歲時正式喺法國學芭蕾舞，憑住驚人嘅天賦同毅力，成為首位獲得獎學金，遠赴法國康城習舞嘅華人。
為完成夢想，Ming Sir日頭做清潔，夜晚負責送餐，亦接觸到世界各地不同著名舞蹈家，令佢成為第一位為法國人編舞嘅中國人。Ming Sir回憶記得學舞時，因為骨頭硬，經過一年、年半、兩年嘅日子先做到膝頭貼住額頭嘅動作，Ming Sir自言係自己捱出嚟，做到呢個動作時，佢亦流下男兒淚。
Ming Sir喺60年代學成歸來，佢創辦舞蹈學校，致力推動本地舞蹈藝術，培養人才。佢喺70年代《歡樂今宵》擔任舞蹈主任，2001年先後為香港芭蕾舞團演出，2007年更獲香港演藝學院頒授榮譽學士榮銜，2017年，Ming Sir喺香港藝術發展獎獲得「傑出藝術貢獻獎」及最高榮譽嘅「終身成就獎」。
Ming Sir喺1979年教舞時獲徐克賞識，繼而參演電影《蝶變》，正式踏入影視圈。而喺80年代，Ming Sir加入TVB，喺40多年嘅電視生涯中，參演咗超過100部劇集，憑精湛嘅演技，演活咗無數膾炙人口嘅經典角色。Ming Sir喺劇集《今生無悔》同《新紮師兄》中，將傳統保守嘅嚴父形象演得入木三分。
Ming Sir曾經表示佢同劇中嘅阿仔對戲會特別投入，因為佢嘅囝囝自細就去咗美國，一去就18年，呢18年亦好少機會父子相見，所以每次拍劇見到戲劇中嘅兒子，佢都會覺得好似見到自己阿仔咁，如果自己嘅仔好似佢哋咁叻就好。
除咗嚴父角色令人深刻，Ming Sir常飾演大反派，當中喺《獵鷹》販毒集團首腦、《鹿鼎記》亦正亦邪太監海大富，令觀眾至今難忘。而Ming Sir喺最後一部參演嘅TVB劇集《賭城群英會》係大反派角色，雖然當時佢已年屆80幾歲，但Ming Sir依然將角色陰險狠辣演繹得淋漓盡致。
Ming Sir喺2013年獲《萬千星輝頒獎典禮》頒發萬千光輝演藝人大獎，同年獲特區政府頒發榮譽勳章。而曾同佢喺劇集《七姊妹》合作，飾演兩爺孫嘅視后佘詩曼得Ming Sir獨具慧眼讚賞演技，阿佘得悉Ming Sir離世後，亦喺網上發文哀悼，寫上：「爺爺，奀豬會永遠記住你。」而蔡一傑、關寶慧、郭少芸、陳法蓉、何遠東、以及同Ming Sir情同手足嘅老拍檔劉松仁亦同樣表示哀痛。