王鎮泉（Jeoffrey）每星期為你提供最熱辣電影資訊，中外猛片專訪花絮上映時間全部集齊。泉叔今個禮拜就帶大家飛去日本東京新宿街頭，直擊電影街霸嘅宣傳。對於近幾代嘅人一定會好熟悉街霸呢隻遊戲，無論係打街機，或者係喺屋企瞞住阿媽偷偷地打都好，聽到昇龍拳，或者波動拳，都一定會好多熱血回憶湧現。
最新預告片全球首播儀式喺東京新宿街頭舉行，除咗吸引好多街霸愛好者，同埋專業Cosplayer之外，仲有街霸嘅五位主演包括阿龍、阿Ken、春麗、本田同埋青狼一齊出席。
對於今次主演街霸嘅一眾演員嚟講，為咗完美呈現每個經典街霸角色神髓，佢哋真係要接受一連串地獄式訓練。無論係啲格鬥招式、還原角色性格，所有嘢都要做到絲毫不差，聽聞喺電影裏面，有大量街霸彩蛋等待大家發掘。
本周電影新片速遞
《命懸3000呎》延續《命懸2000呎》劇情，講述積絲因姐姐喺2000呎高空電視塔嘅喪命意外後傷心不已，為咗克服心魔，決心同姐姐生前好友露絲勇闖泰國，挑戰懸空3000呎的極限高空棧道，向姐姐無懼的冒險精神致敬。點知一場突如其來嘅山崩，二人被硬生生困於萬丈絕壁之上，半步差池定必粉身碎骨！
《抓特務》講新中國成立之初，派出所所長肖大力憑直覺鎖定潛伏嘅特務「5182」馮靜波。為追查真相，肖大力索性搬去同佢做鄰居。兩人交集牽動住兩個家庭、兩代人嘅命運，歲月起落間滿滿波折同變故。呢對一輩子嘅冤家，早已唔再係單純宿敵。
香港票房龍虎榜截至9月2號中午，第1位《蜘蛛俠：英雄重生》、第2位《功夫女足》、第3位《劇場版CHIIKAWA人魚島的秘密》
