今個月3號就係 甘國亮 嘅75歲生日，薛家燕 與 汪明荃 日前就與幾位好友齊齊為佢慶祝生日。相中戴上紅色漁夫帽、身穿西裝外套嘅甘生精神奕奕、紅光滿面，不過當大家同佢唱生日歌合照時，甘生就翹起雙手，擺出cool cool嘅表情，相當百厭。
阿姐喺社交平台PO出眾人為甘生慶祝生日嘅照片，佢喺帖文中寫道：「喜見甘生（甘國亮）身體康復，精精神神，開心同朋友一齊慶祝75歲生日。」而另一位於席生日宴會嘅賓客，亦分享以前與甘生工作嘅經歷，指當年甘生仗義為佢嘅新書發布分享會擔任嘉賓主持，該賓客又指喺生日宴會上，同阿姐與家燕姐傾偈，先知佢哋同甘生嘅深厚交情同淵源。
早前有傳甘生身體狀況出現問題，令唔少影迷與圈中人擔憂，而今次生日宴會嘅合照，證明甘生健康已恢復，唔少網民亦紛紛留言送上生日祝福，並表示看到甘生精神奕奕，終於放心晒呀。
