資深女星南紅（蘇淑眉）係1950至1960年代紅極一時嘅粵劇及粵語片女星，曾與嘉玲、江雪並稱「光藝三大花旦」，南紅近日接受資深傳媒人汪曼玲主持嘅《快拍。曼鏡頭》專訪，分享與已故著名導演楚原長達半世紀嘅婚姻維繫之道與演藝往事。
南紅與楚原識於微時，二人喺片場埋頭開工，交往長達9年先正式結婚，南紅爆楚原係大男人，楚原多年從未講過「我愛你」，亦唔會拖手，南紅笑稱當時冇人追，彼此工作太忙，喺片場朝夕相對，大家都心知對方係啱嘅人，直到有日南紅喺片場拍緊戲，擔心二人感情轉淡，主動提議訂婚。
南紅買對戒，訂婚當晚二人先瞞住雙方家長，只係話約一齊食晚飯，原來係驚喜訂婚宴，席間突然拎出戒指，楚原首先問口，告訴父親張活游，指二人要訂婚，當刻張活游與南紅母親亦大吃一驚，後嚟楚原主動求婚。
南紅透露二人結婚55年嚟從未嗌大交，祕訣在於「互相遷就、順從丈夫」，佢自認喺婚姻裡係「小女人」，凡事以楚原嘅意見為主，雖然身邊有朋友批評佢思想太過落後，南紅認為夫妻之間只要性格一強一弱、互相平衡就唔易產生衝撞，若果兩個均係強勢就唔好結婚。之不過南紅贊同新派愛情觀，覺得「同居後先結婚」，認為年代唔同，南紅話如果佢係現今呢個年代，就揀唔結婚，大家同居就算。
當主持人讚賞南紅係非常成功、做得很好嘅太太時，南紅更講幽默玩笑，稱自己既可以做「小三」，亦可以做「老婆」， 如果自己做小三，就一味叫佢拎錢，自己就看重錢，因為「做小三就係要鍾意錢」 ，但自己揀咗做老婆，就主動讓老公，唔計較金錢，夫妻一心為建立溫馨小家而共同付出。
南紅甜蜜回憶「玫瑰電影公司」由來，指當年公司提出續約，但薪酬太低，無法負擔家庭開銷，公司折衷改為每年畀佢一部電影嘅配額，南紅自負盈虧，由於南紅不懂經營，楚原甘願當軍師，主動幫忙操辦，擔任導演同編劇，南紅擔當主角，相繼拍《黑玫瑰》、《黑玫瑰與黑玫瑰》等 ，南紅話雖然冇賺到大錢，卻成為彼此共同生活回憶。
南紅坦言面對老伴楚原突然離去，屋企得自己一個人時，確實經歷一段痛苦、難過嘅時光，自己用咗兩年時間，慢慢接受生老病死，學會自我開解，明白自己再難過，老伴都唔會返嚟。現年約92歲嘅南紅，先前曾唔小心跌倒兩次，目前需要用拐杖代步，但南紅心態樂觀，認為拎拐杖更穩陣安全，唔介意旁人眼光。