肥媽爆借錢八成無回頭剖白遭圈中人騙財 揚言送金器只獎勵陸浩明老婆

最佳拍檔「肥媽」Maria Cordero 與陸浩明（6號）因合作主持TVB飲食節目《食平D》系列而大受歡迎，肥媽於2015年與6號正式上誼，6號早前求婚成功，肥媽即承諾送上金飾，原來肥媽唔只對契仔疏爽，對圈中人更係仗義相助，肥媽近日接受電台訪問，大方剖白多年嚟借出幾十萬，坦言有八至九成款項早已預料無法收回。
myTV SUPER《食平D》煮出驚喜

肥媽分享獨特借錢哲學，認為有啲人環境好慘，自己唔會借，係直接畀呢筆錢，叫對方唔使還，之不過肥媽強調「每人只限一次機會」，絕唔再借第二次，肥媽話試過曾經有人以「患癌」為藉口騙錢，肥媽雖然覺得無奈，但豁達視幫人為積福：「做善事積咗福，第日我啲孫仔孫女條路會好行啲，施比受更有福。」 

6號早前求婚成功，契媽得知喜訊後高興不已，搞笑稱「現時金價好貴、點解唔早啲求婚」，霸氣承諾送金飾祝賀契仔結婚，盡顯疼愛之情，肥媽受訪時笑言送金器唔係畀6號：「我送畀你老婆仔，得鬼閒送畀你。」

肥媽與6號合作多年默契十足，佢哋透露初期已約定「一個做上靶、一個做下靶」，6號亦習慣肥媽嘅直腸直肚，肥媽亦透露正與TVB商討明年60周年工作，積極提議與6號再度合體開拍全新飲食節目，肥媽強調現時工作純粹為保持生活動力與年輕心態，永不言休。