譚詠麟嘅10場紅館演唱會進入最後倒數，呢日我哋 Enews 特登去到校長排舞嘅地方探班，見到校長精神奕奕狀態大勇，似乎已經進入最佳狀態，佢仲率先小露身手，同Dancers預演一段歌舞《笑看人生》。 
校長話自己依家日日跑步，除咗可以操fit身形，仲可以練氣。對上一次開完騷之後，校長因為冇戒口增磅唔少，佢搞笑話因為自己要集「脂」，而家就差唔多可以分拆上市啦！ 校長跑步操fit一啲都唔寂寞，因為有好多人陪跑，就連呢日排舞，都有好多人來探班，好似 莫家淦、 衛志豪 就話自己要來偷師，而另一位好朋友 馬海倫 就送上好多食物，又有火雞又有燒雞，仲有過百粒茶葉蛋，真係辛苦晒校長又要忍口啦！ 
校長日前喺微博post咗段帶領舞者揮大旗嘅舞蹈，畫面好壯觀，不過校長話演唱會上因為種種考量，佢冇得親自揮旗，唯有將機會讓俾其他人威下。今次因為演唱會分兩part，所以要練嘅舞都加倍，不過校長就華為咗廣大歌迷，一啲都唔覺得辛苦。 
