戀愛真人騷《女神配對計劃2》今個星期日首播，呢日記者上，金牌媒人林盛斌、上屆求愛成功嘅GM曾展望同Sophie葉蒨文，聯同今屆五位女神何沛珈、郭珮文、陳若思、阮嘉敏及俞可程一齊登場。
阿Bob 話呢次賽制除咗全面升級之外，連求愛勇者嘅質素都拋離上屆，之不過，同GM熱戀中嘅Sophie似乎對阿Bob呢番言論好不滿噃：「愛情呢啲嘢，一個鎖匙一個鎖，人夾人緣，無話邊個好過邊個，我就嚴重質疑Bob哥為咗宣傳。」阿Bob即刻解釋係以整體質素嚟睇，好似「高度」同「學識」兩樣。
GM趁機放閃話唔介意，仲好sweet咁話：「我就算高低都無所謂啦，我都有啦。」阿Bob再打蛇隨棍上問GM，如果今屆再參加，要喺五位女神當中揀一個，GM會點揀，GM就諗都唔諗話：「無Sophie 我唔會參加。」可見二人感情真係打風都打唔甩呀。
面對咁高質嘅求愛勇者，連平日俾人感覺冷若冰霜嘅Julianna，都好似成個人脫胎換骨大解放咁，Julianna就話自己喺表達上仲要努力一下，主播 王鎮泉 即刻試用普通話訪問，睇Julianna嘅反應會唔會快啲，果然呢一招成功讓Julianna好流暢咁表達佢嘅感受呀﹗
要融化Julianna，睇嚟識講普通話嘅男士就有啲優勢，至於想靠近Roxanne嘅勇者，就要收斂下，否則太進取嘅話可能會嚇親佢噃！
