陳慧琳Kelly近日推出新歌要瞓身跳舞，搞到佢嚟緊生日都唔敢去太多飯局，怕玩愴咗個心影響表現。Kelly呢日現身品牌活動時就話一定會同屋企人食餐飯簡單慶祝，仲好期待阿仔嘅心意，已經向陪仔表白想要枝唇膏。不過阿仔話冇錢嘅反應就令Kelly好兩難，Kelly透露大仔之前補習賺咗二百五十元，但喺母親節用嚟買花俾佢已經冇晒錢，所以佢唔敢強求，加上最近阿仔應付考試，唔想因為一枝唇膏耽誤咗阿仔學業。
Kelly早前到澳洲工作，順便玩咗幾日，最開心係去到海鮮巿場勁食海鮮，一口氣狂食咗近12隻蟹嘅蟹膏份量，而且隻隻個殼都好似塊面咁大，令佢食得過癮又滋味，點知返港後就皮膚過敏，胸口同背部起紅疹，搞到Kelly都好驚，要食藥同拔罐清毒，最大感受係要喺胸口拔罐好痛。
同場仲有劉俊謙Terrance同廖子妤Fish，二人有份演出嘅電影入圍釜山電影節，佢哋都希望團隊可以一齊參與。而講到電影，劉俊謙有份拍攝嘅電影系列終章雖然已經煞科，但劇組伙食劣質惹關注，劉俊謙謝絕回應太多，只話食物嘅嘢好主觀，佢個人對食物有要求，但對劇組嘅食物不回應，仲叫大家自己揣測。
