林峯呢日出席月餅代言活動，吸引唔少粉絲到場支持，林峯曾經喺劇集《溏心風暴之家好月圓》親手整餅，而佢私底下都好鍾意食月餅，仲曾經一次過食晒成個六黃月餅。
林峯近年工作忙不停，今年中秋應該冇時間陪阿女食月餅玩燈籠，事關佢已經投入新戲拍攝工作，又要兼顧巡迴演唱會，忙到分身不暇，只要有時間就會飛返上海陪老婆同阿女。
阿峯老闆古天樂日前喺澳門開騷，幾位城寨兄弟都有去撐場，大家都好期待阿峯嚟緊嘅個唱，可以再次見到城寨兄弟合體，不過阿峯就有另一個更完美嘅計劃，佢話希望幾兄弟可以一齊開騷，寓工作於旅行，而且大家分擔一人唱幾首，壓力冇咁大。 
古天樂同佢嘅電影公司近日惹上官非，傳出被境外公司入稟追討1.49億，阿峯話自己都有聽聞事件，但事件已經進入司法程序，自己唔方便評論，但就百分百支持老闆。
