慧妍雅集呢日舉行月餅義賣活動，前任會長 朱凱婷 同現任會長 岑杏賢 ，以及副會長 邵珮詩 與一眾師妹齊齊為慈善出力，今次係岑杏賢同邵珮詩接任正副會長後首個公開活動，佢哋都話希望嚟緊嘅日子，可以將慧妍雅集嘅精神繼續發揚光大。
岑杏賢話自己不經不覺已經喺慧妍雅集14年，今年可以以會長身份出席活動，多謝眾會員嘅信任，而邵珮詩就話想趁慧妍45周年，做多啲優化嘅嘢，亦想貼近更多唔同階層嘅事物。而前會長朱凱婷就話每次做慈善活動，可以親身去接觸唔同階層，覺得好warm。
新一屆香港小姐剛剛誕生，兩位上屆師姐 施宇琪 與 袁文靜 就話好開心見證新一屆港姐誕生，而 2019年亞軍 王菲 就更加興奮，因為好多人都話今屆冠軍 袁絲珩 同佢好似樣，王菲指賽前已經好多人send過袁絲珩嘅相同片畀佢睇，而佢睇完亦覺得真係幾似，特別決賽當日佢喺台下睇嘅時候，有種自己喺台上參選緊嘅感覺。
而施宇琪就話好興奮可以卸任，兼見證到新一屆港姐誕生，佢又指呢段選美經歷相當難忘，而現時就可以move on去接受新挑戰。袁文靜就話呢一年經歷咗好多嘢，而自己亦已經轉咗做金融工作，不過佢就話如果公司畀機會佢拍劇或者一啲model工作，佢都想試吓。
呢日出席活動嘅仲有2014年季軍 何艷娟 ，佢喺2018年同年長 40歲嘅前夫吳志誠離婚後，就少咗亮相幕前，不過佢不時喺社交平台分享富貴生活，呢日佢就同大家預告自己正忙於籌備個人畫展，佢就話希望可以同慈善團隊合作，搞一個義賣活動。
