演藝界一代戲劇大師「King Sir」 鍾景輝 早前離世，其紀念展覽正式移師至西九文化區戲曲中心舉行，展覽期由今日起至10月4日，供市民同影迷一同回顧佢傳奇輝煌嘅藝術人生。
開幕儀式今日舉行，現場星光熠熠、氣氛溫馨。活動由King Sir昔日學生 王祖藍 與 蘇玉華 共同主持，亦邀請大批圈中後輩、學生、校友同親屬到場，當中包括 汪明荃 佘詩曼 林保怡 謝君豪 邵美琪 滕麗名 關寶慧 黃浩然 陳國邦與羅敏莊夫婦 江美儀 張文傑 鄧兆尊 吳家樂 姜皓文 及 張錦程 等先後現身，眾人齊聚一同向香港戲劇大師致敬。
開幕致辭中，King Sir姪子鍾志權代表家屬發言，娓娓道出King Sir生前對戲劇藝術嘅純粹投入同熱誠，又提到「伯爺」一向樂於提攜後輩，希望大家可以一齊於舞台上發光發熱。而汪明荃亦形容King Sir係亦師亦友一樣嘅存在，自己當年轉型電視台同演出舞台劇嘅歷程中受益匪淺，視King Sir為心目中永遠嘅導師。
除莊重致辭外，現場亦有歡笑同溫暖嘅回憶分享，昔日學生 謝君豪 於台上就特別準備King Sir生前金句，分享兩人相處嘅有趣點滴；而林保怡同佘詩曼受訪時，就回憶當年合作拍攝《火舞黃沙》等經典作品時嘅趣事，更指King Si於劇組中專業又隨和。
