低調交往4年嘅2019年香港小姐亞軍兼最上鏡小姐 王菲 同唱作歌手兼環星娛樂「太子爺」 張子丰 星期五深夜於社交平台驚喜宣佈訂婚，兩人貼出多張求婚相片同長文大放閃光燈曬幸福，向外宣佈將攜手邁向人生新階段。
現年30歲嘅王菲形象甜美親民，佢2019年參選港姐分別奪得亞軍同最上鏡小姐入行，近年參演過《刑偵日記》、《白色強人II》同《香港人在北京》等多部劇集，亦參與即將首播嘅《死有對証》演出。至於38歲嘅張子丰，於加拿大皇后大學電影系及心理系畢業，除咗係專注前輩歌手唱片同演唱會嘅環星娛樂老闆 張國林 之子外，佢亦身為歌手、演員同導演，又自設製作公司執導微電影同MV。
其實兩人自2021年合作拍攝劇集《法言人》而擦出愛火，雖然過去一直保持低調，私下經常同框同互相探班，感情極為穩定，走過4年細水長流嘅甜蜜時光。
張子丰為向女友驚喜求婚，特意安排於一處歐式湖畔，以「工作拍攝」為由氹王菲扮靚靚盛裝出席。張子丰身穿淺色西裝、手捧大束鮮紅玫瑰，喺斜陽餘暉下加上岸邊佈置「MARRY ME」氣球陣，乘坐佈滿鮮花嘅小船駛至湖中央，單膝跪低送上圓形巨鑽戒指求婚，王菲亦感動答應，於一早到場嘅親友見證下深情擁吻，場面既浪漫又溫馨。
事後兩人又分別於社交平台分享感受，真係甜到漏呀，準新郎張子丰寫道：
時：日落前景：湖中央一條船上人：張子丰、王菲
張子丰：妳願意嫁給我嗎？王菲：我願意。
(2026.08.08)
💍 曾經覺得人生好迷茫，但係妳嘅出現，令我知道原來生活係可以好開心、好幸福咁過。然後有一刻，我知道呢個就係我想一齊過一世嘅人。我覺得，一定係個天派咗個天使落嚟俾我。
由最初好習慣自己一個人生活，到而家自己一個人瞓會有啲淆底、一個人起身又有啲唔慣。好享受每一次二人世界，每個Weekend搵地方玩、搵地方探索、搵戲睇，要一齊睇晒全世界嘅戲。
以前成日有一個唔知屋企係邊嘅感覺，而家知道，邊度有妳有我，邊度就係屋企。
「餘生多多指教」呢啲老土嘢唔講喇，總之以後我哋兩個拍住上，一齊繼續進步、繼續成長；一齊去探索呢個世界、感受每一分每一秒，精精彩彩咁過埋餘下嘅人生。
而甜蜜應承嘅待嫁新娘王菲，亦分享同張子丰將成家立室嘅心情：
I said Yes💍❤️記得剛認識你嘅時候，我就話過你成日懶有儀式感😌果然到求婚呢日 都繼續貫徹你嘅儀式感但今次 我中意😎🥰
白羊座係一個超級三分鐘熱度嘅人（至少我係🙊）但對住你每日都唔厭 想痴住攬住每當有煩惱唔想理 就會萌生「想兩個人一齊逃離宇宙」嘅想法🤣所有嘢可以好簡單好平凡好似只要兩個人一齊就乜都搞得掂一齊放肆食一餐 一齊睇套好戲就可以令我哋開心全日😌
好記得有次聚會我哋有個男性朋友攬住你搞笑地講「張子丰同我一齊啦！」然後你突然間好嚴肅地講「唔得喎！因為只有同王菲一齊嘅張子丰先係the best version 嘅張子丰！所以我冇可能離開佢！」個下，默默地好感動🥹
我諗我呢世人應該唔會再遇到一個我咁愛而又咁愛我嘅人當身邊所有人都同我講「呢個人真係好好」嘅時候我想講「係啊我知啊！所以我揀啱咗啦！」
往後人生，合作愉快🤝🏻💗