吳彥祖最近又有新動向，今次並非拍戲，而係重返賽車場！吳彥祖將作為特邀嘉賓車手，出戰今個月於上海國際賽車場舉行嘅上海站職業聯賽，同場仲有型男演員韓東君落場。
除咗兩位型男藝人車手，香港代表就有曾入圍香港最佳男運動員嘅本地車手盧思豪。佢闊別CTCC戰場一年半，下周亦會於上海站強勢回歸，三人激鬥勢必成全場焦點。
吳彥祖早前曾喺社交平台貼出一張靚仔舊照，指自己喺2001年為宣傳一部電影，喺澳門參加一個慈善賽車賽，吳彥祖當時正值顏值巔峰，吸引無數影迷目光。吳彥祖近年喺美國正式考獲賽車手執照，並積極參與各種職業耐力賽與TCR賽事，最近為上海站職業聯賽備戰，連日忙於參與練習，佢話收穫豐富，能夠喺短時間內取得巨大進步，而佢亦準備迎接第一場比賽。
而盧思豪近年絕對狀態大勇，去年於最高級別嘅世界房車巡迴賽（TCR）以第八名衝線，刷新香港車手喺TCR世界賽的最佳紀錄，成績驕人，今年佢銳意再下一城，完成上海賽事後，便立刻飛去韓國Inje賽道，準備迎接連場硬仗，希望今次可以於世界賽亞洲站開鑼前，取得一個滿意成績，為今年比賽打響頭炮，終極目標係爭取於東望洋跑道再創佳績。
