謝安琪 吳若希 陳楨怡 黃建東 朱鑑然 胡子彤 等藝人呢日現身時裝活動，阿Kay早前陪囡囡飛到美國參與街舞比賽兼享受母女二人世界，返到香港繼續捧囡囡嘅舞蹈表演場。阿Kay感嘆小朋友真係大得好快，所以無論囡囡去邊，佢都想一齊分享難忘回憶，加上大仔細個時事業好忙，好似錯過咗唔少重要時刻，而家囡囡亦就快升中學，所以佢想更珍惜呢啲親子機會。
阿Kay仲笑言，老公 張繼聰 因工作未能同行美國之旅，所以喺囡囡呢次舞蹈表演，自己就讓咗一個靚位俾佢坐。
黃建東 日前被影到同梁凱晴、羅天宇及陳懿德四人行睇騷，除咗天宇被拍到攬實德德離場，阿東同Carina亦被指疑似拖手拍拖。Carina雖然已作澄清，不過東東喺呢日都有再解釋一次，當日係一班人一齊睇騷，所謂拖手只係咁啱角度問題，大家只係好同事。講到天宇同德德，阿東就話自己冇點留意身邊人只專注睇騷，但佢就讚天宇係絕世好男人，至於其他嘢就交返俾當事人回應。
Jinny雖然投入拍攝處境劇《愛．回家之三代同糖》，佢就話拍處境劇嘅收工時間好穩定，每晚8點前都可以返到屋企同仔女相處，加上囝囝即將考小一會有好多需要面試嘅時候，公司都幫佢遷就時間，等佢可以出去面試。
關嘉敏 同 陳星妤 都好開心可以捧場本地時裝盛事，講到戀愛綜藝節目《女神配對計劃2》將會加入隱藏女神，作為第一季女神嘅Carman話亦已經見過隱藏女神，覺得幾有大挑戰性。而Carman仲向節目組推薦過星妤參與節目，星妤自認怕醜，不過唔係抗拒呢種機會，如果收到節目組邀請都願意玩，當做識朋友。
