衛詩雅 近年事業大爆發，憑藉電影《破。地獄》精湛演出橫掃多個影后獎項，早前更一舉奪下「大眾電影百花獎」最佳女主角殊榮，演藝事業再創高峰。雖然日前佢拍攝新劇時意外受傷，嘴唇需縫合50多針，但被譽為圈中「考牌王」嘅佢繼續以堅毅性格，完全無阻其積極工作心態，復原狀況良好。
為慶祝愛妻登頂封后，衛詩雅嘅老公 周祉安 醫生，特別花心思安排一場溫馨嘅慶功聚會，邀請好友一齊分享喜悅。當晚最搶眼嘅莫過於現場嘅重量級成績表，包括金像獎同大眾電影百花獎嘅影后獎座，仲有今年金像獎憑《再見UFO》獲得嘅最佳女配角獎，加上精緻嘅巨型慶祝蛋糕，儀式感十足。
老公Kenley更聽取好友嘅浪漫建議，特別以Michelle早前獲獎當日穿著嘅藍色戰衣作靈感，為老婆準備由百朵藍玫瑰組成嘅巨大花束。Michelle攬住巨型藍玫瑰與老公甜笑合照，甜蜜指數爆燈，令唔少網友都大叫羨慕呀，而Kenley仲喺社交平台分享呢次慶祝會嘅心情，佢寫道：
雖然老婆要返早班0500，但趁太太忙碌之中難得有少少空檔，終於可以準備一個小小的 「驚喜慶祝會」給她，祝賀她得獎。其實一直都好想為太太慶祝，只是一直都未有適合的時間。
多謝一班好友特意抽空出席，一齊見證同分享呢份喜悅，令呢個小小慶祝會變得更加溫暖同難忘。🫶🏻
Congratulations!!（PS: Credit to 朋友的好主意， 100朵藍色玫瑰花（百花奬加當晚獲獎的藍色裙））